尋日有兩單都幾矚目嘅上市公司股東會舉行，分別係阿里巴巴（01688）私有化，同埋城電（01137）賣電訊業務嘅表決。由於爭議性大，好自然畀小股東質，有基金仲識得玩「拉布」添！
阿里巴巴為私有化計劃，畀股東舉手表決。有股東質問管理層，○七年公司上市價係13.5元，過咗5年私有化又係13.5元，公司業績又唔係冇增長，點解股價會原地踏步，仲話阿里股價跌到咁殘，係管理層管理不善，「又唔見同業騰訊（00700）股價插水？」
不過管理層只係搬番通告上面啲官方答案出嚟，又話公司有派息回饋股東…絲絲搵番啲紀錄，阿里上市咁耐，只係派過兩次息，總共0.42元咁大把咋喎！
不過呢位股東都冇機會反駁落去，因為公司只係畀股東問咗兩條問題就投票，而事前市傳有幾個大基金股東已經OK咗單交易，所以條議案都一如預期，以超過95%股數贊成通過。
城電呢邊就大玩「拉布」，會議開咗成個鐘有多！絲絲趁有股東出嚟去廁所嘅時候八到，原來有個外籍股東係咁問問題，又話last question，之後又問多10條！
最後個會開咗兩個鐘，終於開完，而傳說中玩「拉布」嘅股東亦都現身，佢同絲絲講佢係一個基金，佢好唔滿意管理層根本拎唔出例子，去說服佢做電視呢行點樣賺到錢。佢覺得，本身諗住穩穩陣陣買隻公用股，點知管理層突然之間賣咗主業，畀一半嘅錢股東，另一半就拎去做同賭博冇分別嘅高風險投資，然後仲有兩個執董係咁賣股，係極差嘅企業管治表現；佢最後話，手上仲有幾百萬股城電，已經揸咗5年，依家會睇價決定沽唔沽。
畀外籍「芬佬」係咁質，絲絲就諗住問吓主席王維基點睇啦，不過佢完會之後就急急腳走咗。
余絲韻