提起工業生產，以往嘅藍籌股大家不期然會諗起德昌電機（00179）！睇番近期業績，德昌截至今年三月底止年度營業額為21.41億美元，按年增長2%，股東應佔溢利則按年增長2.7%至1.87億美元，比公司自己估計仲高出1%，由此推斷佢業務改善番，預計佢一三至一四年盈利應該會更上一層樓。公司出口業務遍布全球，分散咗地區風險，前景相對穩定。
德昌業務包括生產、銷售馬達、機電零件、動力系統及物料，亦有進行相關嘅貿易事宜。集團嘅工程、生產廠房同銷售業務早已遍布世界各地，管理層一直努力優化業務同調整架構，去提升營運效率，達致合理定價，令各業務都可以保持健康嘅營業溢利率。
集團亦喺近幾年加強咗新產品嘅開發，大力推出市場，亦推出創新驅動應用嘅產品，長遠來說，對集團嘅持續增長以及價值創造有利條件。
集團去年嘅純利能夠比估計為佳，主要係因為汽車產品客戶需求強勁。集團最大嘅汽車產品組別營業額達12.73億美元，汽車產品組別三個主要嘅區域市場都獲得健康增長，其中美洲市場表現最為標青。美洲市場嘅優秀表現，主要因為環保汽車推出，以及好多人開始要換車，用新車取替舊車。
睇番數據，德昌嘅息率約2.1厘。繼續追蹤、出發！
香港大學電子金融服務榮譽助理教授 徐燦傑