絲絲講場：觀瀾湖拍馮導搞主題公園
三個大男人擺埋一齊會有乜效果？原來會變成一台戲。華誼兄弟董事長王中軍、觀瀾湖集團主席兼行政總裁朱鼎健、內地著名導演馮小剛，尋日為成立「觀瀾湖華誼馮小剛電影公社」，在北京聚頭。
朱鼎健預告集團上市
朱鼎健仲講多咗一個好消息，佢哋積極考慮將觀瀾湖集團上市。
佢哋合資嘅公司，觀瀾湖佔60%，華誼及馮小剛分別佔35%及5%。佢哋計劃喺海南島海口市興建獨一無二嘅電影主題公園，項目將落地觀瀾湖海口國際度假區，以馮小剛系列電影場景為建築規劃嘅藍本，匯集電影旅遊、影城、酒店、餐飲、購物、文化等娛樂設施。項目將佔地1,400畝（100萬平方米），建築面積58萬平方米，前期投資金額超過10億元（人民幣‧下同），預計總投資約50億元，回本期約五年，力爭在二○一四年第一季度初步落成啟用。
朱鼎健話，電影公社將會係一個不設門檻，沒有門票嘅公社，希望將文化旅遊大眾化，呢個概念日後會複製到中國其他城市。項目設計中嘅電影場景包括《非誠勿擾》舒淇及葛優入住的鳥巢酒店、《唐山大地震》嘅落寞街道以及《天下無賊》嘅經典火車等等……將一一呈現。
余絲韻