主打湘鄂特色美食嘅深圳A股湘鄂情尋日宣布，會斥資一億人仔進軍學生餐市場。點解做開高檔餐飲會踩過界嘅？董事長孟凱話，舊年八歲嘅寶貝女突然一場急病，原因係營養不良，最後決定整愛心飯盒畀個女食。
內地好多家長都面對仔女唔肯食學校午餐嘅頭痛問題，繼而就出現營養不良。孟凱嘅情況仲弊，嗰女突然發高燒唔退，醫院檢查話係營養不良導致川崎病，而呢個病一般只會喺6歲以下嘅小朋友身上出現。佢查究原因，至發現係因為學校餐太難食，所以孟凱誓要改變女兒嘅午餐，整啲好食嘅嘢畀班小朋友食。
孟凱唔係講笑，個女好番之後，佢即刻做調查考察，收購咗北京幾間快餐工廠，最後公司仲中咗學生餐嘅競標。佢投資咗一億人仔起中央淨菜基地，又使咗2,000萬人仔買埋流動微波隧道專用車嘅專利技術。
唔好以為食物熱辣辣就一定好，由整好、攤凍、裝好再加熱，到運送，飯餸到手乜味都冇晒，班細路梗唔吼啦。所以湘鄂情改用全程冷鏈，整好就急凍，去到學校再加熱，生產過程全程畀學生同家長監控。孟凱因為親情而走入學生餐市場，掂嘅話肯定大把人拍爛手掌呀！
余絲韻