一如所料，剛結束嘅歐盟非正式會議並無任何突破性進展，相信都係要等六月正式峰會舉行先有希望。另一方面，滙豐中國五月份製造業PMI初值回落至48.7，連續七個月處於50以下的收縮水平，而德法嘅PMI更跌至○九年以來最低嘅水平，昨日恒指跌119點算係客氣。
雖然國內外數據都咁弱，但恒指都冇跌穿本月十八日18,622點的低位，而昨日被劏嘅牛仔數目由前日嘅19隻大幅減少至7隻，當中只有4隻喺恒牛證，而目前的街貨密集區同前日大致上一樣，仍然集結於18,400至18,600點之間。
昨日恒指成交仍然維持偏低水平，主板只有479億元，但窩輪成交卻錄得80.6億元，佔大市成交嘅比重由前日嘅13.9%升至16.8%，牛熊證佔大市成交比重則上升約一個百分點至14.3%，達68億元。
經過前日恒指裂口低開後，熊證錄得3,249萬元的資金流入，似乎部分散戶開始改變對後市睇法。
在創過十三年新高嘅沽空比率後，昨日淡友收斂少少，沽空佔大市成交比率終於回落至單位數，錄得9.7%。
大笨象滙豐控股（00005）終於退位，由騰訊（00700）坐上沽空榜首之位，雖然騰訊股價昨日回穩，卻未有減低空軍突襲意欲，沽空金額達3.04億元，佔成交金額比重逾三成。
水泥股近日走勢呈強，主要是由於總理溫家寶一再重申穩增長，加大預調微調力度，並推進「十二五」規劃重大項目按期實施，有望加速拉動基建項目。
內地水泥股龍頭的安徽海螺水泥（00914）股價自上周五在低位開出破腳穿頭的利好訊號後，便開始穩步回升。該股輪證好倉在截至周三的五個交易日共錄得161萬元的資金流入，若看好此股，可吼海螺渣打購（14659），行使價為22.88元，溢價8.1%，實際槓桿7倍，博轉價內輪。
Handsome哥