期指觀瀾：氣氛偏淡不宜加注
焦點就係焦點，無論美股幾好，內地如何放水撐市，但市場焦點仍在歐債，若然歐洲有難，環球投資市場依然冇運行。隔晚雖然美股有驚無險，道指先跌後彈最後僅跌6點，可惜歐洲股市仍然唔生性，英法德股市均跌逾2.3%。
這也難怪，歐盟非正式峰會冇料到；默克爾與奧朗德明顯在推出歐元區共同債券上意見分歧；市傳歐元區國家正各自為希臘「脫歐」作出準備，在眾多不利消息下，環球投資氣氛自然偏淡。
恒指昨日早段低開於18,755點後反覆向下，但試個數次在18,660點水平均見不俗支持，午市更一度見過18,835點，可惜歐洲開市港股就即時腳軟，急跌至接近全日低位18,666點收市，最後跌119點。
歐債前景未明，有投資者選擇先行離場，要不吼位試沽，小注博反彈者雖有人在，但從近期沽空佔大市比例創十三年新高看來，睇淡者明顯增加，反映人心依然虛怯。
策略上，即月期指昨日收報18,513點，雖未觸及上周五低位18,448點，但從即市表現看來，除非後市有大好消息，否則港股要大彈的機會已較早前預期為少，故不打算在低位再行加注，反而繼續持倉並觀察市場氣氛，以不變應萬變。
John Mullen