金占士出嚟行咗咁多年，見過唔少人，最憎係「外強中乾」又貪小便宜之輩，近排有間公司發生咗啲事，間公司嘅CEO就一向喺鏡頭前企硬又寸嘴，其實又係呢類人辦，同我哋嘅貪心特首有得揮。
有幾個負責搞展覽嘅朋友，都同金占士講過佢啲糗事，由於佢間公司喺香港有大批客，所以要借助佢sell產品嘅生產商，每次喺外地搞國際展覽或活動，都會畀面寄份邀請函畀佢，包食包住包機票，而佢每次就會先睇吓地點，然後決定去唔去。咁多年嚟，歐洲大部分地方都會去，唔去可能真係忙緊，但係鄰近嘅日本，佢就差唔多次次到。
呢啲情況其實好正常，但原來佢有個跟身多年嘅女助手，就專門負責出面同生產商講條件。試過有一次舉辦地點響南歐，近舉辦場地唯一四星級酒店高級房已經Full晒，生產商老闆因為要兼顧會場而入住，但就幫呢位CEO安排咗間遠少少但高級數嘅酒店，點知佢就堅持要住呢間，搞到人哋老闆搬出讓間房畀佢。
仲有其他小便宜，就係每逢有正嘅新產品，佢就會要求生產商寄多幾份畀佢，佢就可以獻畀佢出名鍾意IT嘢嘅老闆試用。
但原來佢每次出差，最驚就係撞到香港傳媒，個騰雞樣同佢喺香港地頭簡直係兩個人嚟，見到記者成個人好誇張咁彈開，喺餐廳就如坐針氈咁坐到直不甩，淨係識得黑面，唔通驚畀人發現佢接受款待？講真，話晒你都有啲知名度，又唔係公務員，唔該有啲大將之風，表現大方啲，輕鬆打個招呼咪得囉。
金占士