呢排好多上市公司搞周年股東大會，每年重選執行董事同獨立非執董已經係必經嘅議程。上市只有年多啲中國金石（01380），前晚公布股東大會個投票結果，計埋主席兼行政總裁陳濤在內，三個執行董事嘅重選都以超過99%嘅高比數唔獲通過，都係比較少有嘅例子，公司發言人話會搵到合適嘅接任人員就會公布。
中國金石一共有13項嘅議案，都係圍繞通過舊年嘅財務報表、重選執董非執董，同埋授權董事會釐定董事薪金。不過喺重選陳濤、林玉華同埋廖原時出任執董嘅議案上就出現高票反對嘅情況，其中反對陳濤出任執董嘅佔比就高達99.23%。佢哋三個唔獲重選為執董，加埋有獨立非執董喺股東會舉行前已經宣布唔再連任，令到公司嘅獨立非執董同埋審核委員會人數少過聯交所嘅規定。
絲絲尋日就打去公司問吓究竟發生咩事，公司發言人就話，陳濤喺股東會舉行後就退咗主席職位，依家只喺出任行政總裁，仲話呢個係股東會嘅決議之一。至於啲空缺點處理，佢就話依家公司仲討論緊，搵到合適嘅人選就會有公布。而公司尋晚仲發咗個澄清公布，話佢哋三人仍然係公司嘅僱員，會以其他身份繼續効力，仲話日常嘅業務不會受到中斷添！