內地監管機構人事調動頻繁，好多位都係喺銀行系統入面撬過去嘅，好似郭樹清咁，就由建行（00939）調咗去中證監做主席。查實監管機構仲有啲「吉位」要搵人填，據聞下一個係潘功勝。
人民銀行啲大位一直未搵到適合人選，除咗行長周小川就退休，未知邊個接之外，上年十一月副行長馬德倫退咗休，個位到依家都仲空缺緊，有消息話，農行（01288）副行長潘功勝就有機會升任人行副行長。
人行以往都係由內部擢升管理層，如果潘功勝升任人行，就會係繼朱民之後，第二個由內地商業銀行轉做人行副行長嘅高級管理層，而且人行副行長職位一直都係培養大型內銀董事長嘅搖籃，睇嚟潘功勝仕途真係大有空間喇。朱民係由中行，調入人行，然後再上一層樓，跳咗去國基會（IMF）做副總裁。
絲絲記得潘功勝曾經做過工行（01398）董秘兼股改辦公室主任，前後分別帶領工行同農行成功上市，可以話係內銀股改上市大功臣。
至於年紀漸大嘅周小川，一直都傳工行董事長姜建清係大熱接班人選，一旦屬實，換班塵埃落定時，人行高管班底咪同當年工行上市時有幾分相似？