胡潤尋日發布「中國外來富豪榜」，同大家數吓喺大陸做得風生水起嘅「過江龍」。絲絲發現，原來台灣富豪喺大陸賺嘅錢最多，人數佔咗成張榜單嘅57%，以五百億元（人民幣‧下同）身家成為首富嘅旺旺集團董事長蔡衍明，同埋以450億元家族財富，排喺第二位嘅頂新國際董事長魏應交，原來都係來自台灣嘅「過江龍」嚟。
俗語話「唔係猛龍唔過江」，喺胡潤嘅外來富豪榜單上面，最猛嘅過江龍係55歲嘅蔡衍明，身家比舊年多咗一百億，達500億，成功揮低魏應交，第一次坐上外來首富寶座，而嚟自香港、觀瀾湖嘅朱鼎健家族，以財富300億元排喺第三位，身家都比舊年多咗40億元。
可能因為係去大陸發展之前，大部分富豪都已經賺咗「第一桶金」，所以計吓上榜嘅外來富豪，平均年齡有成59歲，比胡潤百富榜上面大陸富豪嘅平均年齡高咗7歲，而且大陸富豪多數會喺廣東同浙江設立企業總部，但係班外來富豪就對上海情有獨鍾，都好嘅，兩批人喺唔同地方駐扎，大家唔使為咗搵個靚靚辦公室，爭餐死囉。