中證監主席郭樹清上任半年幾，雷厲風行、破舊立新嘅處事風格，唔單止令內地業者刮目相看，連紐交所行政總裁尼德洛爾都忍唔住要讚好。
前兩日尼德洛爾喺北京出席演講嗰時，對住班內地記者主動大讚郭主席，話覺得佢最近一啲做法真係非常正面，令到佢非常之睇好。
其實何止係尼德洛爾對郭樹清有讚冇彈，內地證券業者都好鍾意佢，散戶更對佢有好大期望，封咗佢做救世主，拯救一班受盡證券業制度不健全所害嘅股民。
受到中國概念股假帳風波影響，年頭到依家，得一間內地公司喺紐交所上市，比舊年嘅七間同前年嘅廿二間，真係少得多。尼德洛爾承認，現時美國投資者對中國公司比較敏感，中國公司喺紐交所上市嘅門檻都因為事件而高咗啲，不過就覺得長遠嚟講其實係一件好事。
佢估，未來十年，中國仲會有超過五千間企業成為上市公司。雖然近排A股係咁跌，成交仲愈縮愈少，但係佢話，長遠來講都仲係睇好中國股市。至於交投淡靜嘅問題，以交易所嘅角度，只可以控制啲可以控制嘅嘢，好似做好市場技術同結構建設，增加投資者信心之類，講到提升二級市場交易活躍度，只可以話紐交所有啲嘢你做唔到就係做唔到喇。
余詩韻