Market Insight：瑞聲毋懼風高浪急

希臘打爛仔交，環球股市缺乏利好消息，港股同面書（facebook）一樣變了好友噩夢，一彈就散。昨日恒指跌252點收報18,786點，下周三結算的五月期指，插到18,586點先肯停，比除息後合理值18,712點低水126點，反映基金認定持好倉過夜乃危險動作，紛紛透過沽期指為過市股份進行套戥，而且，沽空佔大市成交比例，由9.68%升至14.67%創N年新高，比去年八、九月歐債危機第一波高位14.1%仲要多。

淡友成為市場大多數，以往經驗隨時有挾淡倉可能，不過今朝滙豐會公布五月份中國製造業PMI指數，由近期極弱數據，以及五月至今得幾百億人仔的內地新增貸款數字，坊間估PMI會凶多吉少，想撈底等埋十點半數據睇清形勢至算。

放大圖片

放大圖片

大孖沙都要中招

日日有基金愛股出事，寶姿（00589）後，輪到掛牌僅一年零三日的上海醫藥（02607）。內地傳媒報道公司被中證監及港交所（00388）調查，股價最多跌三成六，午後一眾膽生毛之士撈底下，跌幅收窄到兩成四，跌2.93元報9.11元，同一年前招股價23元比較，輾轉潛水六成。睇番港交所披露易，淡馬錫仲揸住16.19%，來自美國馬利蘭州傳統基金T.Rowe Price揸咗10.95%，摩通揸10.06%，而大摩亦揸8.14%，就連社保基金都中招揸9.12%，五個大孖沙揸住街貨五成四，證明了兩件事，股市草木皆兵下，在避險上，大孖沙絕對唔會比散戶有優勢（咁大手貨想沽都無人接也！）；其次是國企唔見得比民企安全得多，試問今日何處是樂土？

中國燃氣（00384）昨日開市見9.74億元大手上板，最後成交9.96億，估計同幾個股東轉倉有關。自從中石化（00386）夥拍新奧（02688）以每股3.5元提出全面收購之後，中燃幾個主要股東高調地耍太極兼嫌出價太低，中燃股價一度炒到上4.11元，直到近日股市轉弱才跌返到3.75元水平，收到賓架界消息，話市況唔就加上索價太高，新奧有意打退堂鼓。

消息當然未經證實，不過一葉知秋，古勝一直介紹趁低撈貨的新奧公司債，由年初低位88至92水平，矮仔上樓梯上返去98至99水平，相比提出收購，以及被評級機構因收購可能構成融資壓力而降級前的103水平，已還原基本步。

照常理，只有兩個可能，一，債商睇新奧收購可以唔使加價下成交，仲會係發股唔發債取得融資，二是交易告吹，新奧債務評級有機會重返提出收購前水平，且看最後邊個結局。

蘋果產品造勢叻

貴為全球最大市值企業，蘋果公司公關及銷售部們，每次新產品面世前的部署，確係非一般大公司可以媲美，隔晚有幾宗新一代iPhone消息，先有傳今次設計是教主Steve Jobs遺作，顯然是為提升果粉購買欲造勢的一單傳聞，另外，有專攻蘋果產品網站，繪聲繪影在網上放出iPhone傳聞中屏幕，較現時iPhone 4S的3.5吋大啲，去到4.1吋，同三星的S3的4.8吋收窄差距。

每次蘋果傳有新產品曝光，例炒瑞聲科技（02018），估唔到昨日除息兼跌市，仲有0.516元進帳，收報24.5元，強勢畢呈，依家通街醜股或者你未必想買隻近期完全無跌過嘅股票，但假如係早前揸落，睇走勢六、七月iPhone 5曝光前，見27、28元的機會唔細，不妨比多啲耐性。

嘟QR編碼睇行情

古勝又有好介紹，為了向讀者提供更多優質服務，《東方產經》已將部分股市行情版的資訊放到手機版網頁上，讀者可以用智能手機的閱讀QR編碼應用程式，掃描刊於行情表內的QR編碼，快速進入相關網頁，瀏覽包括派息備忘、沽空紀錄、大手成交等行情資訊，讀者更可掃描在古勝專欄內的QR編碼，查閱港股二十大升跌及成交的即市資訊，緊貼市場脈搏。

古勝