一級紅酒拉菲（Lafite-Rothschild）喺中國內地市場有價有市，年份好嘅分分鐘可以炒到10萬元一支，但如果絲絲同你講一一年釀製拉菲跌價45%，你又敢唔敢買呢？除咗經濟唔好，炒賣熱潮退卻，仲有種種原因導致一一年佳釀價格偏軟。
倫敦國際酒類交易所（Liv-ex）一一年拉菲新近報價大概要8,410美元一箱，較一○年同○九年釀製嘅價錢分別低41%同埋45%。同期其他波爾多紅酒價錢亦慘不忍睹，好似二級酒莊Chateau Cos d'Estournel嘅出品報每箱1,680美元，較之前兩年嘅價分別低45%同62%。
毫無疑問，一一年波爾多區春天乾、夏天涼，都令到整體葡萄收成麻麻。不過，最致命嘅，係連星級評論員Robert Parker都喺專欄講，一一年嘅葡萄唔夠前兩年好，令到炒家對呢年嘅紅酒冇憧憬，炒唔起。
唔知係咪冇得炒，所以都少咗亞洲人去買，令酒價受到雙重打擊。「白馬酒莊」Chateau Cheval Blanc嘅負責人接受《彭博社》訪問時就話，新釀嘅酒入樽之前，通常都有好多亞洲遊客嚟試飲，但係嚟試飲一一年酒嘅亞洲遊客，明顯比早幾年少咗好多。
有分析就話啦，一○年同○九年嘅佳釀喺早兩年中國經濟好好景嘅時候，確實有啲炒過龍，近期歐美經濟唔好，中國又唔係好掂，加上年份唔好，新酒又要陳年約十年先至可以飲用，一一年酒跌價係無可厚非。如果真係要玩紅酒呢種另類投資，不如去搵一啲年份較舊嘅酒仲好。