絲絲講場：晒百卡巨鑽 格拉夫夠燄氣
英國殿堂級珠寶格拉夫（Graff Diamonds）創立品牌逾半個世紀，好快就會喺香港上市，尋日喺香港搞投資者推介，正式同全港賓卡打聲招呼，場面當然唔會失禮人！享負盛名嘅「鑽石之王」Laurence Graff，身為格拉夫主席兼創辦人，仲專誠帶嚟多顆令人怦然心動嘅稀世美鑽，至於全場最架勢堂嗰舊梨形巨鑽名為「火燄」（The Flame），更加有成100卡D色級數。
除咗Laurence Graff，阿仔Francois Graff話晒係格拉夫行政總裁，集團來港上市咁大件事，當然亦有露面出巡，呢對父子檔嘅魅力，可以話與場內展示嘅炫目珍藏寶石互相輝映，計埋在場四位外籍美艷模特兒身上各自超過100卡嘅全副首飾，淨係保險費用應該相當可觀，不過觀察所得，場地保安措施並無想像中咁森嚴。
28日起公開招股
其實，Laurence Graff舊年已經開始吹風，話睇中香港集資市場，估唔到依家市況咁險峻，亦無阻呢個「英國皇室御用品牌」來港上市嘅主意，可見集團大舉進軍亞洲同埋內地市場嘅堅定決心。消息稱，格拉夫集資規模近8億美元，每手100股計，入場費約3,737.3元。集資所得近五成三將用作收購，一成九用作償還貸款，擬於本月二十八日公開招股。
余絲韻