孖妹S檔案：股票經紀 金時唔同往日

張：恒豐證券董事總經理 張華峰

高妹： 張老闆，你喺呢行成四十年，見盡股票經紀嘅光輝歲月。過去咁多個旺市，邊段時期搵客最容易呀？

信誠證券副總裁 何智威

證券學會會長 李細燕

　張： 當然係七三年啦！當年股票經紀唔使搵客，啲客會自動搵上門架！不過有時即使客人主動搵上門，都未必可以成功開戶，因為啲股票經紀忙到唔得閒理佢哋！

彩兒： 當年咁「客」源滾滾，你哋咪搵好多錢囉！

　張： 當年港股嘅成交量只有數億，上市嘅股票得幾百隻，所以最賺錢嘅時期唔係七三年，而係四會合併時期，國企紛紛來港上市，市場漸趨暢旺，成交量大幅增加，股票經紀嘅人工咪幾級跳囉。之後隨住科技發展一日千里，投資者可以透過電腦進行股票交易，股票經紀喺○○年嘅薪金可算係高峰期，可達一千幾百萬年薪o架！

高妹： 嘩！咪成七、八位數字收入！怪唔之得啲人成日話金融界人士可以「魚翅撈飯」啦！

　張： 以前股票經紀係好容易搵錢，但依家進入咗嚴冬時期！現今市場存有太多衍生工具，牽涉到唔少人為因素，我哋已再難用傳統經濟理論去分析股票，客戶自當無所適從！即使歷史悠久的大企業如滙豐（00005），都會受窩輪或者Accumulator（累計期權）影響，股價都會較為波動，令到市場充滿投機性，散戶輸錢機會亦高，整吓整吓，便得番愈嚟愈少投資者留喺市場！

彩兒： 吓，客戶係股票經紀嘅「米飯班主」。咁講法，佢哋唔止無得食魚翅，仲分分鐘要食「穀種」喎！

金牌經紀難敵大炒家

　張： 唉，股票經紀愈嚟愈難搵食！首先，唔少證券行都以低收費搶客，喺低成本嘅政策下，經紀仲點能夠提高服務質素！另外，全球邁向一體化，國際化產品嘅需求大大提高，但本港嘅資源卻未能配合，加上現已進入高端電腦時代，股票經紀再難用傳統手法推銷股票，出現人人自危嘅局面！

高妹： 股票經紀有冇分等級？點為之金牌經紀？

　張： 我哋以前叫金牌經紀做「金手指」，泛指一啲喺市場好活躍嘅人，佢哋睇好嘅股份大多會跑出，可謂「篤邊隻，贏邊隻」！佢哋以前經常會有聚會，睇吓大家炒邊隻，交換吓意見，所以買股嘅命中率好高！

彩兒： 如果可以早啲拜會呢班老前輩，我哋手上就唔會有蟹貨啦！

　張： 市場已經畀啲大炒家話晒事架啦，佢哋拎住咁多資本嚟香港，金牌經紀又點夠砌！

何：信誠證券副總裁 何智威

高妹： 你九三年入行做股票經紀，當年係第一年實施考牌制度，會唔會好難入行？

　何： 唔會，未考牌之前仲難呀！以前啲證券行大多係家族生意，多數會請返家庭成員，加上當年證券行唔似依家咁多，所以嗰時想入行都入唔到！後來出現考牌制度，反而提供一個入行嘅機會！

九七高峰做到「踢晒腳」

彩兒： 你入行嘅時候，正正係港股起飛時期，當年搵客咪好容易？

　何： 係呀！當年係唔使搵客，客人就會自動搵上門！我記得最鼎盛時期係九七年，做到我「踢晒腳」，工作量多到連幫客人改價嘅時間都冇，當時通常只可以勸導佢哋排住隊先！

高妹： 當年我仲讀緊書，未能參與全民皆股嘅盛況，不過我記得爸爸媽媽都有買返幾手，仲成日話打唔到畀經紀買股呢！

　何： 當年嘅通訊邊有依家咁好，個個都打電話入嚟買股，咪搞到「Jam線」（打唔通）囉，所以我哋最鍾意爽快的客人，最怕客人問長問短架啦！

彩兒： 人們常說錢銀係「賺得快時使得快」，咁你當年會唔會較為揮霍先？

　何： 呢行壓力大，部分行家會喺放工後去食飯、唱歌、打麻雀，但我本身唔太喜歡呢啲消遣活動，所以並無特別參與！不過，講開又講，雖然股票經紀搵錢容易，但承受嘅風險較大，如果客人走數，我哋需獨力負責。我自己都試過畀人走成十幾萬數，真係賺埋都唔夠蝕！

高妹： 依家資訊科技發達，唔少投資者都自己買股，你哋係咪生意難做呀？

　何： 唉，確實如此呀！現在嘅客源真係少咗好多，以前每星期都有兩至三個新客，依家則要兩至三個月先有客人開戶呀！我哋嘅薪金亦隨即大縮水，相對高峰時少咗八、九成呢！

李：證券學會會長 李細燕

彩兒： 你做股票經紀已經廿年，你賺到啲咩呀？

　李： 我喺呢行廿年，至今累積咗唔少客戶，大大話話都過萬！所以咁耐以嚟，賺得最多嘅係客戶嘅不離不棄！

高妹： 咁你當初入行嗰時係點搵客？

　李： 最初嘅客戶主要來自身邊嘅親朋好友，他們再一個介紹一個，便累積到今日嘅客源！然而，近來市況不景氣，如果依家先入行，就較難去搵新客喇！

彩兒： 依家唔少圈內人都話股票經紀係黃昏行業，我哋睇番港交所資料，發現C組證券行愈嚟愈少，其市場佔有率由九九年高峰期近四成，縮減至今年四月唔夠一成！睇嚟股票經紀嘅生存空間愈嚟愈小！

冀推佣金「二級制」自救

　李： 係呀，部分經紀佣金已跌至得「一滴」（0.01%），股票經紀大多已無啖好食喇，所以我哋提出佣金「二級制」方案，對抗「零佣金」制度，希望可以加大股票經紀嘅生存空間啦！

股市及股票經紀相關大事

年份 事件

1998 金融風暴襲港，恒指於八月份下瀉至6,544點

2000 科網股爆破，港股下挫至13,596點

2003 取消最低證券買賣佣金0.25%限制；沙士肆虐，恒指低見8,331點

2008 金融海嘯衝擊全球，港股曾下跌至10,676點

2011 港交所實施第一階段延長交易時間至5小時

2012 港交所實施第二階段延長交易時間至5.5小時

高妹、彩兒

若有料報畀高妹同彩兒或有嘢問，可電郵money.biz@opg.com.hk