相信大家都覺得，呢幾個月中證監成為「一行三會」裏最忙嘅監管機構，主席郭樹清自然係最忙嘅一把手啦。講到忙，中證監嘅發審委委員應該感受最深，事關尋日佢哋要喺8個鐘頭內，審完9間公司嘅IPO申請。聽講計劃上市嘅公司仲排到後年呀！
審批時間表一公開，就有投資者話，1日嘅office hour得8個鐘，發審委嘅人唔夠1粒鐘就要審完1間公司，係咪太瘋狂呢？為咗應付忙到抖唔到氣嘅困境，發審委決定開4場會，大家分攤去審申請上市嘅9間公司。咁都好啲，唔係容乜易批錯㗎。
截至上個禮拜四為止，排隊等過會嘅公司有成677間咁多，以依家80%「合格率」嚟睇，就算每日批1間，都要到後年底至完成審批上市。嘩，發審委肯定仲有排忙咯。
至於一行三會最忙嘅郭主席，唔經唔覺已經主政半年有多，有人幫佢計咗「新政激情200日」裏面，淨係中證監公布佢喺各個場合嘅講話就有17次，去過四個地方做調研，又快速召開經濟學家座談會。佢同下屬係用「成盤棋」嚟回應市場，絕對唔係單打獨鬥。
中證監做嘢嘅效率高咗，郭樹清又夠親民，打破晒以前啲主席封嘴嘅惡習，努力同記者溝通，淨係通氣會都已經搞咗23場。佢咁勤力sell改革，都係想個市好啫。奈何佢上台至今，滬綜指跌超過5%，似乎都無乜起色咁喎！