香港係國際金融中心，去銀行開戶口，話咁快就搞掂。金占士最近收到風，話一眾「尊貴嘅立法會議員」、政客、政府財金官員，都會受到銀行「特別對待」。不過唔係特別優待，而係審查得特別嚴格。
某立法會議員同金占士講，有次佢到某家發鈔銀行開設普通嘅儲蓄戶口，結果用咗兩、三日先搞掂。期間仲有銀行職員打畀佢，查核佢嘅身份。有賓卡朋友想買人民幣債，用開嗰間冇得買，過隔籬街第二家開戶口，點知又係查家宅，最後截咗止都未開到戶口。就算係金管局財金官員，去銀行開戶一樣無情講。
金占士聽聞銀行咁做，係因為香港作為主要嘅國際金融中心，要完全遵守國際標準做法。依家全世界都好着緊防止有人洗黑錢，特別係涉及黑幫及幫助恐怖分子轉移資金，更加唔可以走漏眼。據悉，銀行手上都有一份名單，政客、政黨、財金官員都喺名單之列。呢份名單，更加係「全球通行」，如果唔放心手上嘅名單係咪齊全，更可幫襯中介機構，買資料對照，總之就係要做到滴水不漏。
本港「賓卡」（banker）話，要決定一個客係唔係高風險人士，要睇番佢嘅國籍、資金來源同職業，除咗政客同佢嘅屋企人，連找換店同夜總會嘅老闆都算係高風險人士喎，因為佢哋有可能接觸到大額資金，開戶審批過程比一般客戶多好多工夫。
九月就舉行立法會選舉，有意參選嘅人士，如果唔想麻煩，可能要及早開定銀行戶口喇。
金占士