絲絲講場：中證監新logo「綁蟹咁綁」
呢幾日中國證監會為主辦國際證監會組織年會忙個不停，身為主人家，佢哋仲畀大家一個驚喜，就係安排中證監嘅LOGO喺年會度亮相，仲做埋心口針添。但網民即刻發現個LOGO有隱藏「綁實股民」之意，亦有人發現同兩間公司嘅標誌倒模咁似。嘩，會唔會畀人告o架？
內地行政部不嬲冇自己嘅LOGO，工作人員仲話，以後會喺重要活動度使用添。而個LOGO係寓意「三公原則」，代表中證監將努力促使證券市場堅持「公開、公正、公平」嘅原則。
澄清圖案設計非抄襲
之不過網民戲稱，個標誌同中國股市一樣，冇頭冇尾，環環相套，寓意「套牢」呀！有啲就好抵死咁回應，「炒股毀一生，套牢窮三代！」
最慘嘅係網民話中證監嘅LOGO係山寨貨，同波蘭藝術設計和網頁設計公司MOOSEART嘅LOGO，除咗顏色唔同，圖案完全一樣，望落又同福建三信集團個標誌大同小異添。眼見剽竊人哋創意嘅質疑撲面而來，幫中證監設計LOGO嘅東道設計公司，即刻公開咗設計師嘅原創過程圖，力證原創性。而MOOSEART嘅標誌根本冇係內地註冊，所以中證監嘅LOGO係合法o架！