創業板股份無縫綠色（08150）近年多阻滯，與前股東打咗一輪「消耗戰」，就連開股東會都波折重重。
事緣喺二月九日，應當時共持有公司12.35%股權嘅股東Good Capital同王先生的要求，公司決定喺三月十九日喺東莞一間酒店召開股東特別大會，建議罷免6個董事，但之後另一股東JMM就喺三月六日向公司同7個董事發出傳訊令狀，指佢哋喺一項收購上面違反職權，並要求股東會改喺香港舉行，方便股東出席投票。
於是公司將股東會改喺五月十一日，透過視頻會議喺香港同東莞同時舉行，點知Good Capital喺三月十四日又向公司同7個董事發出傳訊令狀，指控佢哋企圖以發行新股同認股證嚟攤薄佢哋嘅股權，要求法庭聲明嗰啲認股證同新股無效。
喺五月嘅股東會之後，公司股份就一直停牌，期間仲公布咗首季業績，直到尋日開市前公布，原來當日股東會上，有個股東出示咗張大律師嘅法律意見，話公司無權將股東會延期；所以公司建議直情重新召開一次股東會，不過就要先取得Good Capital同意，希望最遲可以喺六月八日開到會；呢單嘢睇到絲絲頭都暈，睇嚟啲股東都有同感。唔知係咪小股東都怕煩，一復牌就即刻同佢分手，尋日股價跌咗4.49%，收報0.425元。