絲絲講場：恒生張樹槐買酒花立功
絲絲weekend睇報紙，專揀啲唔使用腦嘅內容，恒生銀行（00011）傳訊及企業責任總監張樹槐（Walter）就職業病上身，周末睇鬼報，都可以幫公司搵到啲賺幾倍嘅投資產品，絲絲真係差幾皮，要自我檢討吓。
Walter平日返工已經睇好多報紙，由嚴肅嘅到八卦嘅，都走唔出佢對法眼，有次仲話馬經版有啲財經料，叫絲絲要留意吓添，大佬呀，邊有咁多對眼呀，真係唔到你唔服喇。
睇到報道靈機一觸
佢搵到啲乜嘢投資咁犀利？話說喺○六年某一個周末，喺FT睇到一篇報道講○五年法國嘅佳釀屬於上好年份。佢靈機一觸，向當時嘅行政總裁柯清輝建議，買定一批酒花，既可到時到候用嚟招呼貴賓，又可以做投資，柯大俠又buy呢個建議喎！
話晒品酒都係一門專業，Walter知道恒生有兩女將堪稱係呢科嘅專家──恒生中國副董事長兼行政總裁薛關燕萍，同埋已離職，過咗檔去香港蘇富比擔任洋酒部專家嘅陳文珣，於是請教兩位「師姐」買乜紅酒好呢？
佢哋當時提議嘅酒花組合，包括「靚次伯」酒莊Chateau Lynch Bages，同埋拉菲嘅副牌Carruades de Lafite，終於入咗大概50萬蚊嘅酒花。
回報兩倍 就快飲得
六年後批貨依家估值要160萬元，「回報」超過兩倍，當中以Carruades de Lafite表現最好，帳面利潤有七倍，靚次伯升咗兩倍，真係和味過炒樓或放貸。呢批靚酒存放喺博愛堂，估計起碼要陳年多一兩年丹寧先至會變得柔和，希望到時恒生可以請絲絲去試飲就好咯。其後佢哋都有為「酒庫」添啲比較平啲嘅酒，呢啲就隨時飲都可以。
余絲韻