近年發掘民企「問題」再配以沽空策略，似乎已成為一種新興嘅賺錢模式。金占士早排同證券分析員老友happy hour時，度咗條橋出嚟。話說大家都好想喺呢個熱潮搵番筆，橋唔怕舊，最緊要有人受，老友話不如學會計師行嘅「偵察審計」方式，將發掘到嘅「秘聞」賣畀訂戶。
呢個世界，點解有人飲頭啖湯，有人咁慘接火棒，全因金融市場嘅「資訊不對稱」造成。「渾水」係結合調查及沽空於一身，金占士同老友都認為，可以抄一半橋。
同傳媒機構一樣，分析員都會就住上市公司嘅業務發展做分析，好多時上市公司管理層嘅描繪能力頂呱呱，講到天上有地下無，分析員有時都要「深入虎穴，查過究竟」，同做偵探冇分別。
老友話，既然用咁多工夫發掘出具「佐證」嘅「踢爆」料，淨係個過程都好值錢，如果定向售予「訂閱客戶」，唔難成為一條新財路。
其實「偵察審計」早年已出現，主要由金融機構根據顧客需求，透過公開資訊「起底」目標公司，為顧客確認目標公司是否值得投資、或能否成為可靠嘅交易對象。而金占士老友嘅構思，係將無數、無特定目標公司嘅調查訊息，擺喺一個平台上，資訊任君選擇，搵到目標，大可好似「渾手」咁，先行沽空。
金占士