絲絲講場：郭樹清：咪當股民傻仔
香港近年流行做民意調查，如果目標係要為中證監主席郭樹清評分，好大可能係非常高分，皆因佢上場以嚟，成日出招搞好股票市場呢個平台，仲成日為散戶發聲，十足十股市包青天一樣，尋日又喝住班券商，唔好再將啲投資者當傻仔咁呃！嘩，講得咁直接，散戶條氣即刻順晒。
叫券商勿賺不義之財
郭主席上任半年嚟，時時都將規範市場秩序，保護投資者權益掛喺口邊。前日佢喺北京出席券商創新發展研討會時，更加直接咁叫班券商，唔好諗住賺啲「不義之財」，將啲投資者當傻仔呃嘅日子已經「一去不復返」啦。
史玉柱信A股快行運
內地新股造富神話不斷，上市公司圈錢速度之快、超額募集資金之多，不時令人驚嘆。郭樹清話可以接受新股80倍市盈率，不過要有好嘅理由。對於券商創新，佢表態支持，仲話對創新出錯要理解同包容，不過，佢提醒班券商要謹記幾個原則，包括唔賺取不義之財，將客戶當傻仔咁呃。
主席咁為小股民着想，難怪得到公眾嘅擁戴。巨人集團老闆史玉柱都忍唔住要喺微博上為郭樹清拍爛手掌，仲講到明自己係擦郭主席鞋，因為自從郭樹清上台後，一路致力壓縮細價股泡沫、修復藍籌股低估嘅現象，令佢相信依家，尤其係「十八大」之後，中國股市一定有運行。