牛熊輪流炒：港交所睇跌 敲14881
市場經過周一的「狂風暴雨」後，昨日仲係陰陰沉沉，恒指高開低收，全日波幅248點，成交縮番去500億元唔夠，焦點放喺幾隻公布業績的重磅股身上。滙控（00005）首季增長9%，遜於預期，但核心盈利表現好過預期，股價暫時企得穩。
不過，昨日沽空榜上滙控排頭位，錄得1.63億元沽空額，佔總沽空4.26%，反映唔少人對大笨象缺乏信心，份成績表實際又未好到可以扭轉未來觀感，加埋政治出現新局勢的歐洲又佔其業務不少比重，都係審慎為上。滙控認股證非常旺場，活躍度僅次恒指，錄得9.6億元成交額。
港股收市跌51點，即市低位20,399點，剛觸及街貨密集區的邊緣，共20隻牛證被打靶，當中12隻是恒指牛證，估計涉及約3億至4億份街貨。截至周一，不少睇勢走位的股民衝入博牛，當日恒牛街貨增加9.5億份，總街貨37.8億份，熊證總街貨減少1.4億份至21.6億份。
另一重磅股港交所（00388）派首季成績，唔好係意料中事，季度盈利11.48億元，按年跌7%，多間大行齊齊發功，吹水睇淡，大摩維持減持評級，目標價睇100元。總裁李小加出身投行，說話技巧好高超，繼續大sell競購LME的大條道理，但都無助港交所的短線壓力，股價二月見頂後一直尋底，120元邊頂得幾耐好難講。
認為短線再跌的投資者可吼港交麥銀沽（14881），今年十二月四日到期，行使價120元，實際槓桿4.3倍。
Handsome哥