Market Insight：汽車股捧場客多
喺日韓台星泰尋日全線回升之下，前日跌得最勁嘅港股不但冇得做「復仇者」，尋日先升後跌51點，認真令人失望。收市後滙控（00005）公布首季業績按季多賺9.4%，低於市場預期嘅雙位數，雖然「英國象」股價仍比本港收市價高1蚊有多，但恒指後市可能要再下試兩萬關。
滙控季績差，但核心盈利又高過預期，只係睇你點去解讀。恒指250日線得而復失，但其實冇乜參考作用，港股自二月尾見頂之後，其實一直未有較明確走勢，大戶千幾點內玩波幅牛熊通殺，散戶愈玩愈冇癮，喺向上或向下突破前，成交相信只能維持悶局。
外圍股市亦相當反覆，前日歐股應跌未跌，昨日早段又偏軟，法國及希臘新政府如何運作只係靠估，短期拍債結果會係新指標。
新地（00016）卒之跌穿90蚊，舊年十一月低位係90元，舊年十月低位係85.45元，俗語話接下跌中的刀仔好易損手，但點計風險度都低過博華寶（00336）、國美（00493）等民企股，尋日亦有近億資金博新地輪刀仔鋸大樹，但新地單case有排搞，淨係輸時間值都好襟計。
高息股仍有價有市
國際油價上周五跌穿100美金之後亦反彈無力，內地減成品油價再無懸念。油價跌反映對經濟前景悲觀，但油價跌亦減輕通脹壓力從而有利經濟復甦，以此推斷油價未來升跌幅度都係有限。
油價升跌對兩大煉油股好難清楚講好與壞，但航空股肯定歡迎低油價，內地三大航企近日股價中興，但最勁仍係北京首都機場（00694），股價累升四成，惟其客運量已接近飽和，傳聞第二新機場已選定落戶大興區，將於五年後首航，並成為全球最大機場，追首機嘅股友亦要密切留意進展。
今時今日收息股仍係長升長有，最明顯例子係中銀香港（02388）同領匯（00823），買樓高風險，買股輸多過贏，買債冇肉食，買金亦驚十一年牛市結束，所以穩陣高息股始終有價有市。
東風炒上落搵到食
汽車板塊昨見異動，主要係借住剛結束之北京車展炒一轉，而內地次季汽車銷量如無意外可重現增長，何以咁有信心？皆因舊年同期遇着日本海嘯蹂躪，日系汽車零件供應鏈短缺，令到基數特別低。雖然以此比較有取巧之嫌，但今年內地汽車銷量仍應有單位數嘅增長，每年賣車1,800萬輛，全世界嘅車廠都以中國客戶喜好為依歸。
買車股好有選擇性，舊年最掂嘅當然係賣寶馬嘅華晨（01114），今年貴價車嘅增長放緩，連帶大昌行（01828）在內嘅汽車代理股亦大幅回吐，國產車長汽（02333）及吉利汽車（00175）取而代之，最主要多得公務車要全部用國產車政策，長汽今日除息前再升6%，並再挑戰上市後新高。
東風集團（00489）一向穩穩陣陣，皆因合營多、車款多兼乜類型都有，等如車股當中嘅綜合性企業，加埋預測PE得8倍幾，雖然唔可以好似細車企有突破性增長，但憑住內地汽車市場未來自然增長，憑市場優勢亦與更多外國車廠合作生產，其增長能力也毋須懷疑。
東風首季少賺5.4%，但全年可以恢復增長，原因係舊年某程度受日本汽車零件短缺影響。如果想投資內地汽車市場，又唔想買其他大起大落嘅車股，東風肯定係不貳之選；如果唔太貪心，13到15蚊炒上落亦相當唔錯。
中石化唔好表錯情
執筆時發改委是否一如市場預期下調成品油價格尚未有消息，昨日部分汽車股及航空股已率先炒上，股價逆市高收，惟見中石化（00386）斯人獨憔悴，唔驚唔覺股價已由上周高位8.44元，回落至昨日低位僅7.82元，連250日線亦告失守，真係弱過藥煲！
究其原因，首季內地經濟增長放緩，影響成品油需求，加上國際油價回落，成品油價下調預期強烈，進一步打擊交易量，致使旺季銷情不旺。據聞上月中石化嘅銷售僅及目標的一半，為挽狂瀾，在發改委下調成品油價格前，中石化經已率先自行下調成品油大區的調撥價。
當市場廣泛意識到呢個現象嘅時候，中石化估值勢必受壓。故看官千萬別表錯情，諗住可以入市執平貨，料季內股價會繼續尋底。
古勝