民企風暴呢一波，似足火燒連環船，依家仲未燒到隊尾，市場上存在好多「有心人」，想借勢搵番筆，甚至不惜抽人哋水。
呢期最紅嘅係渾水公司（Muddy Waters）嘅創辦人Carson Block，之前放風話香港民企就快爆煲，但又成日都唔「出手」。卒之尋日市面就流出一份「疑似」出自渾水嘅港股沽空目標名單，仲有成35隻咁多；但個名單淨係得啲名，同埋Code number，又無註釋又無原因，望落好似好流吓！
金占士個老友都幫眼睇過，都話可信性低，分明有人學渾水，甚至可以話「抽渾水嘅水」。
老友進一步分析話，中國諺語有謂「人怕出名、豬怕壯」。渾水公司創辦人Carson Block舊年憑住「嘉漢事件」「增磅」之後，自然開始有人抄佢嘅「搵食」模式，照辦煮碗「唱衰兼沽空」中資股。之但係，要「扮豬食老虎」，都起碼抄足啲，畀啲誠意整份似樣啲嘅報告，講吓人哋嘅業務運作有乜問題，市場係咪暗中起變化，至可唱衰人哋，至可以慫恿人哋齊齊沽空吖。
尋日呢張「疑似」渾水沽空名單，齋得啲名，既無渾水一貫嘅排場、又無解釋；有啲上榜嘅民企，街貨都唔多，想沽到「冇肉食」，都唔知可以問邊個借貨，唔通叫個大股東自己沽自己？金占士奉勸想抽水之人，做吓功課先喇！
金占士