洗黑錢方法層出不窮，各地區政府同銀行過去幾年，好落力做好把關工作。滙控（00005）早前請咗前美國財政部專家Stuart Levey出任集團首席法律總監，統領反黑錢行動，佢仲好高調咁幫滙控解畫，以證明佢哋有決心清洗洗黑錢活動。
滙控喺美國嘅業務，因為被指涉及洗黑錢，兼內部監管有瑕疵，已經畀幾個唔同地區嘅政府機構「請飲咖啡」（調查）。Stuart Levey話，要打擊黑錢活動，就要同政府打好關係，幫手查察非法資金，依家喺美國嘅防洗黑錢團隊，已經由一○年嘅75人，增聘到250人，呢位反黑錢鬥士，真係好有決心喎。
反洗黑錢一戰睇嚟唔易打，英國報章尋日有相關報道，仲引述外洩嘅機密文件，話滙控有需要作出監管改善，報道仲繪形繪聲咁話佢哋做錯啲乜，睇嚟Stuart Levey要加把勁喇。