恒大地產（03333）搞內地房地產之餘，可算係最落力搞運動嘅內房企業，籃球足球都好熱衷。絲絲記得佢哋話成立恒大皇馬足球學校，老友話已經入直路，好忙咁招緊生，皆因太多人想報讀。
間學校首期耗資成七億人仔，招生活動喺四月正式開始，雖然每年學費要成三萬五人仔，不過老友同絲絲講，各地嘅反應都相當踴躍，有家長仲一接到招生簡介，立即由瀋陽坐飛機去廣州睇環境，受歡迎程度可想而知！
呢間坐落廣東清遠嘅恒大皇馬足校，喺全國24個省都有報名處。佢哋唔單止有一般學校學科，顧名思義，學校亦會培養學生喺足球方面嘅知識同訓練，而教練仲係由西班牙皇馬派過嚟，難怪咁受歡迎啦。學費超過三萬幾蚊，好似淨係有錢人至入到喎！老友話係誤解，學校聯同中國扶貧基金會，對合資格嘅貧困學生進行資助，即係話，只要你有潛質，就會保你入去。
足校首階段計劃招收約3,000個學生，不過咪以為有錢就一定有得入去讀書，老友話之後皇馬會派出一眾教練，為報名嘅學生進行面試。但係唔識踢波唔緊要，聽講話面試主要都係着重個人嘅潛力，睇小朋友有無呢方面嘅條件去發揮。