Lady GaGa喺香港開演唱會，絲絲咁靚咁潮，梗係都要去湊下熱鬧啦！其實潮人又點只絲絲，睇show嗰日撞到好多財經界熟悉人物，好似「殼后」朱太、金利豐（01031）行政總裁朱李月華一家人都係座上客！
絲絲同好多粉絲一樣，戴住假髮、着皮短褲、魚網絲襪，搽埋黑指甲油去「朝聖」，絲絲好豪o架，一係就唔睇，一睇就梗係揀最靚嘅位，千幾蚊一張飛，畀得起有餘啦。絲絲坐得好前，所以（目及）到好多嘢，包括同絲絲一樣咁「癲」、咁潮嘅名人原來好多，好似李丞責、莊思敏、李玟、陸恭和等，個個都着得好潮，所以霎眼見到幾個着深色套裝好鬼formal嘅人就好顯眼，望真啲原來係朱生朱太一家人。
絲絲見到佢哋坐響場中間嘅VIP座位，呢啲位每張要成1,580蚊，而且有錢都未必買到，所以坐得響嗰度都係非富則貴，絲絲赫然見到朱生同朱太，隔籬仲有佢哋位公子朱俊浩（Kingston）同佢女朋友羅之琦（Kelly），睇佢哋一身嘅衣裝，好明顯係放工趕過嚟嘅，而全場朱生朱太都幾拘謹，反觀Kingston同Kelly就好high好投入喇。
余絲韻