高盛阿頭布蘭克費恩二月頭幫人權運動組織做代言人，挺身而出撐同性婚姻，成為首位公開撐同志嘅美國企業舵手，不過支持小眾亦要付出代價，布蘭克費恩最近向一班華爾街同志維權分子呻，高盛因為撐同志，已經至少失去一個客戶啦！
布蘭克費恩呻住咁話，支持同性婚姻並唔係無代價，嗰位客仔因為高盛嘅決定，就同佢哋講「分手」，唔肯再幫襯佢哋嘅財富管理服務。邊位客仔咁有「性格」？布蘭克費恩死都唔講，只可以話講出嚟相信大家都唔會意外。佢重申，華爾街比任何行業都更支持同志。
除咗布蘭克費恩，身為虔誠天主教教徒嘅美銀行政總裁莫伊尼漢亦表明撐同志，話唔會歧視員工嘅性取向，最緊要係做番自己。
高盛女同志董事謝爾話，有個「直」嘅男同事同佢講笑，話佢係唯一一個公司獲准總統大選時投票畀奧巴馬嘅董事。一語道破咗華爾街從業員政治取態嘅矛盾，就係應唔應該投票畀主張減少金融監管和課稅，但唔太支持同志維權嘅共和黨總統參選人羅姆尼？布蘭克費恩就話，班下屬鍾意投邊個就投邊個啦。