新劇開播 咪話唔驚
睇番人稱「秋官」嘅鄭少秋對股市嘅影響力，由演出《大時代》丁蟹開始，到近年《非常外父》、《御用閒人》同《潮爆大狀》，甚至重播秋官有份擔正嘅劇集一開機，個市都好似食咗瀉藥咁，所以今個月秋官套新劇《心戰》開播，都咪話唔驚喇。
絲絲唔知秋官依家係咪揸重貨，尋日打畀佢，想睇吓佢行邊一步，畀啲方向都好呀，不過佢尋日唔得閒，老婆官晶華代答，佢睇嚟好老定喎，淡淡定咁同絲絲講，皆因秋官依家「已無咩點玩」，自然一身輕。仲話唔會因為「市場慣性波幅而拋售股票」，專業論點似乎早有準備。雖然秋官老婆大人對「秋官效應」可能無咩感覺，但精明股民以古鑑今，好難唔腳震，何不袋好啲錢等睇好戲呢。