絲絲講場：黃錦康想美聯還佢清白
提早辭任美聯（01200）副主席兼執行董事高職嘅黃錦康（Albert），尋日開始恢復自由身，佢話想趁呢段時間休息下，調理好身體，同時亦想話佢嘅離任同早前美聯員工「勞資糾紛」事件無關，希望美聯主席黃建業幫佢澄清下，仲強調自己係好鍾意美聯呢間公司同埋同事。
同「勞資糾紛」無關
尋日Albert約咗絲絲茶敍，講到過去三個月發生嘅事，係佢人生最艱難嘅日子，除咗因為阿仔嘅離開令佢好傷心，期間發生嘅「勞資糾紛」亦令佢好勞氣，因謠言嚴重影響到個人聲譽，仲話一定會追究添，希望主席為佢澄清，還佢公道。
Albert話自己好鍾意美聯呢間公司，好錫佢，亦好鍾意美聯嘅同事，未來亦會一樣咁錫，聽到佢哋組成「鐵三角」管理層（即主席黃建業、阿女黃靜怡、銷售總監黃子華），都好想了解吓，美聯月底嘅股東會，Albert話一定會去，仲話如果公司搞得好可能再入股。
希望開班教太極
提到自己成立咗12年嘅股壇紅綠燈有限公司，佢話係專做企業管理及預測，近日都有唔少客戶接觸佢。佢話嚟緊想擺多啲時間係太極方面，開班授徒咁話。
余絲韻