絲絲講場:電盈小股東求「神」打救

諸事不順,好多人會求神拜佛,做電盈(00008)小股東原來都想求神──希望股神打救!電盈舊年十一月分拆嘅香港電訊(06823),股價至今累升36%,作為阿媽嘅電盈,升得11%,明顯交唔到功課。電盈尋日開股東會,一直對管理層好多意見嘅小股東,就獻計畀主席李澤楷,搵股神巴菲特入股,打救一眾小股東。

獻計搵巴菲特入股

佢哋呢把怨氣都積咗好耐o架喇,電盈股價沉底多年,好多投資者都慨嘆股價根本冇可能見家鄉,依家仲揸住唔放都係為咗道氣,有啲話要嚟警醒自己唔好再犯同樣嘅投資錯誤。求助股神呢個另類方案,係電盈小股東聯盟成員陳仲翔諗出嚟,這個方案雖然只係搭巴士有感而發嘅奇想,惟他認為電盈股價低迷、但派息穩定加上旗下香港電訊有龍頭地位,要打動股神這位價值投資者入股,亦唔係絕冇可能。佢仲話即使公司以大折讓配股畀巴菲特,小股東亦未必會介意。

紅雞蛋點醒李澤楷

電盈要獲股神眷顧又談何容易呢,小小超聽完建議亦好有禮貌地回應「股東提出唔同意見及方案管理層都會考慮」。

陳仲翔尋日嘅另一招係派紅雞蛋畀李澤楷,佢話BB啱啱滿月,借機想畀李澤楷知道,佢自己同家人投資唔少資金喺電盈股份度,希望李澤楷明白身負重任,要搞好公司喎。

余絲韻

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!