絲絲講場：數碼通勁挫 黑開有條路？
風水命理信不信由你，有股民就一口咬定新地（00016）流年不利，高層捲入廉政風暴、旗下數碼通（00315）年初無限上網嘅「彈弓手」安排、四月初又發生罕見嘅大規模網絡事故，搞到客戶怨聲四起，辛苦多年建立嘅品牌形象面臨考驗。
陳啟龍減持 未必睇淡
數碼通尋日股價無端端急跌4.7%，有人就歸咎數碼通4G部署唔及對手，又有缸中人話係由於公司董事接連減持累事，總之就傳言滿天飛啦！
根據聯交所權益披露資料顯示，數碼通執行董事陳啟龍，喺四月十八日至廿六日期間，原來曾經五度透過行使介乎4.5至4.56元嘅認股權購入數碼通股份，然後再以介乎16.125至16.518元嘅平均價，減持合共115.45萬股公司股份。
以數碼通尋日收報14.6元計，股份市值達1,685萬元，減持方式係以「訂立出售上市法團股份合約」方式進行，即係話減持事件可能係因之前訂立嘅合約而觸發，唔一定代表佢睇淡公司前景而減持，但股民就唔理咁多，當咗係負面消息，唔怪得之股價無端無咗幾個巴仙。