香港股壇掀起核數風暴，內地散戶咪一樣受到上市公司做假帳問題嘅荼毒！外號「民企之父」嘅張化橋，近排畀人問到祖國企業假帳問題有幾嚴重時，就毫不客氣咁答話，睇吓中國嘅假酒有幾多，貪污腐敗有幾普遍，企業嘅假帳就有幾嚴重。事關都係「龍的傳人」所為，係同一文化下嘅產物。雖有「中國第一分析師」嘅稱號，但張化橋好坦白話自己都曾經多次受騙於假帳呢個中國土製地雷。
佢本來好反對政府干預股市價格，但面對假帳橫行，股票貨不對辦，或者股票價格離譜嘅時候，都應該要檢討吓貨幣政策同股票發行制度係咪合理，企業帳目係咪基本真實。佢又「敦促」企業高層同大股東，喺欺詐成功，彈冠相慶之餘，都要為無數受害者默哀。
張化橋喺四月初，辭去民生國際（00938）執行董事及行政總裁職務，有人估佢會去做對沖基金，絲絲唔知呢個估計真唔真，但可以參考吓佢最近喺blog寫嘅內容。
佢上周六寫咗篇關於對沖基金心酸淚嘅文章。話說佢讀咗對沖基金經理David Einhorn嘅書《Fooling some of the people all of the time》，本書講作者用六年同一家上市公司肉搏嘅驚險同心酸，張化橋形容本書如泣如訴，令佢難以放下。唔知呢啲內容對佢嘅未來路向，算唔算hints呢？