絲絲講場：英兩「主席」爭住管保誠
最近市場對英國保誠（02378）下屆主席嘅人選議論紛紛，事關保誠主席韓偉民早前公布，一旦覓得繼任人選就會喺今年卸任，並以六十歲之齡退休。
拉德猛料又夠勤力
絲絲收到風，保誠已經物色咗兩位來頭甚猛嘅接班人，就係身兼英國機場管理局及工程公司Invensys主席嘅拉德爵士。今年65歲嘅拉德曾被譽為英國最忙嘅主席，不過佢最近已經縮減擔任董事嘅職務。
之不過，有批評話拉德缺乏管理亞洲業務嘅經驗，質疑佢係咪有能力去參與保誠搬總部去香港一事，以逃過歐洲更嚴厲嘅監管制度。
另一人選就係英國著名出版社集團皮爾遜主席兼萊斯銀行集團董事莫雷諾。
阻滯多 主席路難行
業務涉足英國、美國同亞洲嘅保誠是非多多，韓偉民宣布卸任一事，已經引起唔少人推測，係咪同收購友邦（01299）觸礁一事有關。公司嘅業務亦都遇到好多阻滯，包括最近多個銀行家同分析師對保誠將要分拆嘅揣測，再加上歐資保險商將要面臨監管要求嘅改制。
咁波濤洶湧嘅形勢，絲絲認為要帶領呢間英國保險龍頭公司更上一層樓，領導人少啲分量都唔掂，邊個能夠上位，拭目以待喇！