金融大鱷「食人唔骨」嘅事聽都聽得多喇，原來佢哋都有和善嘅一面！精於投資科網企業嘅著名創投基金Andreessen Horowitz嘅六名合夥人，計劃將佢哋畢生喺基金賺到嘅錢，捐一半出嚟畀慈善機構，為殘酷嘅金融界帶嚟一點溫暖啊！
基金創辦人安德雷森話，希望佢哋咁樣做可以向其他私募基金同創投基金樹立好榜樣，一齊為慈善出一分力。另一位合夥人霍羅威茨仲話，如果佢哋隻基金可以成為頂級創投基金嘅目標，可以為慈善機構帶嚟數以10億美元計嘅捐款o架！
究竟點解佢哋忽然有個咁嘅念頭呢？安德雷森同霍羅威茨話做慈善其實係貫徹公司嘅作風，但提出建議嘅係另一名合夥人韋斯，佢喺應徵加入公司嘅時候提出嘅。佢哋仲講笑咁話，好彩佢哋無咩奢侈習慣，如果唔係都唔可以身體力行企出嚟做善事。
Andreessen Horowitz呢隻基金真係唔嘢小，佢哋投資超過100間企業，當中包括facebook、Groupon、Twitter、Zynga同Instagram等大科企，自○九年以來總共集資27億美元，成立咗只係三年就已經可以將2億美元嘅本金畀投資者喇。