聽講今年商業機構加人工手緊咗，但金管局尋日年報披露高層人工，總裁陳德霖（Norman）份人工加幅超靚，浮動薪酬加咗超過三成半，乜唔係話浮動薪酬係睇外匯基金表現做人嘅咩？外匯基金投資表現增長邊有三成幾咁多呀，咁即係兩者脫咗鈎啦！
年報顯示總裁舊年固定薪酬係600萬齊頭，浮動薪酬203.8萬元，其他福利（包括公積金、醫療、保險、年內累積年假）就有100萬，總數係903.8萬元。
根據慣例，Norman舊年收份人工，其實係反映緊一○年嘅工作表現，就算扣除其他福利，佢固定加浮動總薪酬升幅，都有7.1%，一樣跑贏大市，因為絲絲記得一○年外匯基金投資回報率都係3.6%。
雖然話Norman嘅浮薪部分唔係淨係睇外匯基金表現，但都係參考嘅重要因素之一，邊有理由差咁遠。而且絲絲記得喺一○年時，袋袋平安嘅固定薪酬係600萬，浮動係150萬，咁嗰時上任冇耐，150萬表現又點嚟？
金管局發言人就話，Norman筆浮動薪酬係根據表現，由財政司司長參考外匯基金諮詢委員會轄下管治委員會建議審批。
外匯基金舊年嘅投資回報率係1.1%，下年呢個時候嘅金管局年報，大家可以再睇吓，管治委員會究竟畀總裁幾多花紅，到時又會唔會脫鈎o架？計絲絲話齋，想服眾最好跟大市，四捨五入齊頭加1%。
余絲韻