近排一眾國有銀行公布業績都唔錯！中國貸款業務受惠於內地資金緊絀環境，加上近年人民幣產品興起，潛力真係唔細！
中銀香港（02388）係老字號，提供銀行及相關金融服務。集團旗下嘅企業銀行業務，近年積極增加優質貸款。中銀近年嘅企業貸款業務方面，同國有銀行一樣，都有着強勁增長。加上利息環境許可，令中銀新做貸款嘅定價提高，增加回報。睇起上嚟，喺中銀企業貸款市場入面已經非常出名，領先地位牢不可破！
隨住澳門經濟發展，大家都見到濠賭股賺到笑！中銀香港正正係澳門銀團貸款市場嘅最大安排行，生意真係唔憂做！加上人民幣跨境貿易結算已經擴大覆蓋至全國各地，中銀憑住優厚嘅服務質素，自必然可以加快拓展貿易融資業務，令業績更標青啦。近年推出多項跨境貿易融資嘅新產品，足以睇到佢爆發性嘅增長潛力！隨住香港同內地企業客戶需求不斷增加，該行近年嘅貿易融資額獲得迅速增長。
除了每項服務質素提升外，集團近年打造嘅全方位服務，成功獲取中小企客戶支持；加上積極參與港府推出嘅「中小企融資擔保計劃」及「銀行特別信貸保證計劃」，貸款業務方面又多一條門路！集團近年為針對中小企嘅需求，成立一間全新、全面嘅商務中心。睇番數據，集團市盈率11.7倍，息率5.26厘！繼續追蹤、出發！
香港大學電子金融服務榮譽助理教授 徐燦傑