股神巴菲特日前自爆患癌，令絲絲同唔少擁躉都甚為擔心，講開股神，佢個仔亦即未來巴郡非執行主席霍華德‧巴菲特就繼續行善積德，務農嘅佢宣布搞咗個慈善活動，呼籲當地同業齊齊捐出部分農作物收入畀Feeding America，而佢自己亦坐言起行，舊年感恩節喺家鄉附近搞咗個學童午餐活動，贏盡細路仔嘅掌聲！
Feeding America主要幫助冇飯開嘅窮人，喺美國有53間食物銀行，係當地最大嘅反飢餓慈善機構。而霍華德今次搞嘅農民捐款活動名為「Invest an Acre」計劃，雖然知道籌到幾多都好視乎農民嘅收成同埋農作物價格，但希望籌到善款至少以百萬美元起標，佢自己有個慈善基金，今次會捐出多達300萬美元。
霍華德話，呢次籌款活動唔係完成咗就算，佢好希望教育農民關注飢餓問題，鼓勵佢哋利用多出嚟嘅收入去幫人。事關今年美國農夫以破紀錄農地面積種植玉米，大部分發咗芽，可以藉着即將來臨嘅豐收期，號召更多同業行善。
霍華德務農35年，喺美國伊利諾伊、亞利桑那州同埋南非都有農地，但不失high-tech，佢部拖拉機必備空調、手機、收音機，仲有GPS導航系統同iPad。