絲絲講場：中國閒食情意結 改名蠟筆小新

絲絲睇佢份上市文件，公司依家係內地第二大果凍產品生產商，市佔率超過一成，核心品牌係「蠟筆小新」，喺內地講起「蠟筆小新」，大家都知係做果凍產品，不過絲絲就好好奇，上市無耐啫，做乜失驚無神改名，而唔喺上市時直接用呢個名呢？聽講話，原來一開始老細都想用呢個名上市架，不過連投行啲人都唔建議，驚有誤會，影響到上唔到市喎。

此「小新」不同日「小新」

初時絲絲都誤以為公司係同日本嗰個小新有關，但原來係完全無關架。喺○五同○七年，日本株式會社雙葉社曾經向內地有關機構申請，要推翻公司嘅商標註冊，最終因為公司無用對方嘅肖像、亦係早過對方首次喺內地出現之前已經註冊咗，最終裁決唔屬於侵權。總之唔會惹官非，股東都可以放心。話晒都係用呢個名起家，老細咁鍾意呢個名亦無可厚非！除咗中文名之外，公司英文名都改埋，唔係用日本嗰個名「Crayon Shinchan」，而係用普通話直譯「Labixiaoxin Snacks」，真有趣。

余絲韻