Market Insight：體育股打翻身戰

話說「沽神」同客戶透露，近日正押注德債淡倉同時買入相關信貸違約掉期（CDS），「打孖」賭歐豬債務危機最後會火燒連環船，拖累德國債息飆升。「沽神」在美國次按風暴中一沽成名，但過去年半確係黑過墨斗。

去年初買美國銀行股票，到下半年歐債危機輸鑊甘止蝕，沽清後，去年十月銀行股大反彈，變咗戥人高興，賭中國概念的嘉漢林業，兩個月輸掉5億美元，破晒基金創立後來單一投資損失紀錄，拖累旗下基金由高位計損手51%，意味要追返去water mark的分紅水平，至少要贏番104%。睇情況，如果「沽神」唔盡快賭鋪勁去收復失地，大客流走難免。

「沽神」手風極唔順

吊詭係，極少對沖基金會建立倉底期間「爆響口」，到底「沽神」係對自己無信心，希望借助市場力量齊齊唱衰歐元區危機？抑或純粹大大聲細細注試試水溫先決定加注？不得而知，但寧可信其有，「沽神」光過大光燈係不爭事實，昨日傍晚西班牙拍賣兩年及十年債反應尚可，至少賣出債券金額達到預期範圍，看來債商冇「沽神」咁悲觀，要急於翻身，「沽神」睇嚟要搵其他idea至得。

人民銀行話支援製造業、服務業及中小企業，將適時降低存款準備金率，街外估今年至少有兩至三次，各50點子下調空間。放水預期推波助瀾下，港股昨升214點報20,995點，三月期指行先一步，重返兩萬一關口樓上，報21,019點輕微高水，可惜成交唔算配合，得471億元，似挾倉多過基金大舉入市。

估值便宜啱晒短炒

昨日剛推介保險股有炒落後條件，昨日走勢可人，新華保險（01336）升5.5%，平保（02318）升2.9%，唯一意外係首季保費收入倒退的國壽（02628）都升3.9%，似乎博反彈的買家都唔係諗住同股票談戀愛，單係估值夠平經已唔理三七廿一掃埋一份。

內地傳媒報道，杭州金星之後，順德市一間小型房企廣德業公司申請破產，內地嚴厲壓抑樓市炒風死灰復燃下，可以預期類似新聞陸續有來，對上市內房股影響有好有壞，有利在於更多中小型財政能力的房企倒下，資本密集的房企生意將逐漸演變成寡頭壟斷、強者愈強的情況，短期而言，則或多或少對內房取得融資的成本持續上升。

同個賓架傾開，醜股之中佢睇好體育用品股，皆因市場九成九人睇今年幾個龍頭務必積極出清過時存貨，毛利率想好睇都難，一二、一三年業績甚至可能倒退。不過，股價也反映得八八九九。從國壽昨日升勢畀到在下啟示，短期盤數麻麻唔緊要，芬佬一窩蜂博反彈，第一要搵夠平，第二係要行業龍頭，貪佢夠大隻，上落車容易，始終想同佢做人世的仲係少數，博幾日死貓彈，估值去到單位數水平，要再跌風險相對較細。

睇好騰訊咪太心急

體育用品股最大隻係安踏體育（02020），市值195億元，市盈率得9.1倍，未來幾日會出今年第四季定單指引，如果唔係想像中咁差，隨時出現挾淡倉情況，早前股價在7.6元搵到支持，要博上番8.5甚至9元，應該唔難。

昨日有關內地政策的消息特別多，其中一條是財政部話要加大文化發展投資力度，預計今年相關開支將接近500億元人民幣，再加上另邊廂facebook在美上市計劃正進行得如火如荼，帶動科網股身價，近日騰訊控股（00700）股價迭創新高，昨日一度高見240.2元，最後收報237.2元，升0.17%，大漲小回格局未變。

之不過，古勝認為，技術上騰訊股價已進入超買區，手上冇貨現水平才高追未必划算，即使睇好板塊前景，穩陣起見等回吐出現，在220至230元水平先至好分注行事。

古勝