今年上海會作為「個稅遞延型養老保險」嘅試點，呢點會令唔少保險公司受惠。個稅遞延型養老保險係乜？就係將保險作為稅務優惠嘅條件，呢點有助保險公司增加壽險嘅滲透率，影響深遠！
中國太保（02601）係一間領先嘅綜合性保險集團公司，集團附屬公司同關連公司持續不斷為全國各地個人同機構客戶提供廣泛人壽同埋財產保險產品。太保同其他保險集團一樣，設有附屬公司─太平洋資產管理，負責管理同運用公司嘅保險資金。
集團近年着力鞏固自己應對國際金融危機衝擊嘅能力，不斷以實現平穩較快增長為目標，風險喺可控制嘅範圍。睇番全國保險市場，近呢兩年都仲有良好發展，整個市場實現保費規模達1.45萬億元人民幣，增長30.4%。喺呢個大市場底下，集團市佔率達9.9%，着實犀利！
集團呢兩年保費收入增長迅速，市佔率不斷增加，資產規模不斷擴大。太保有鑑於股票市場下滑趨勢，以及壽險準備金評估利率曲線下移嘅影響，早已做好防備措施，所受影響較細。最重要係集團近年專注行銷渠道方面，令整體銷售能力得以提升。大家都知啦，保險公司最着重就係營銷團隊，能夠有一支好隊伍，自然勝人一籌。睇數據最實際，太保市盈率20.74倍，低過中國人壽（02628），息率有1.74厘。繼續追蹤、出發！