有基金老友啱啱響北京返嚟就搵金占士落酒吧度呻，話之前200億人仔QFII好難sell，依家又開多500億，而且都好鬼急。中證監啱啱宣布新批11間RQFII，「幸運兒」包括友邦，歐、美、日、韓、東南亞基金，十足大開中門，請八國聯軍救市。老友話一啲都無誇張，佢話舊年聖誕前宣布嘅200億RQFII，只係為咗要達到中央送畀香港嘅大禮嘅標準，香港證監會都好幫手，趕得切喺舊年年底批出。
但近幾個月，實際係京城備受薄熙來事件影響，內地基金唔敢入市，搞到A股一直尋底，有違中央話要提振股市信心嘅言論。
老友爆料話，其實中證監本來話到復活節假後至宣布，點知突然響清明假前，即係四月三日夜晚宣布新一批RQFII，銀碼仲漲大到500億，搞到啲基金，以至香港證監會都打個突，因為好多技術問題都未搞清楚。
不過近排A股唔吸引，老友都苦笑話，上次200億都未完全消化，最後佢說明來意，想問金占士有無興趣買啲。金占士啲錢已經存晒做人仔定存，收番3厘半但慳番驚風散錢。
金占士