好多歷史故事都證明到，裙帶關係嘅出現足可影響朝代嘅興衰，聯想（00992）母公司聯想控股主席柳傳志，亦深明呢個道理，佢喺成立聯想嘅初期，已經定下天條，明令禁止公司高管子女加入聯想，即使係政府領導或重大客戶要推薦子女入公司，亦要經極嚴格批准，絕對不會「選擇性執法」。
外界早已公認喺柳傳志嘅領導下，聯想一直最堅持係公司要由專業管理人接班。佢日前喺內地大學演講時就透露，創業團隊已經定下規矩，無論大家子女有幾出色幾優秀，一律都不准加入公司。至今唔單止呢項「天條」未破，就連政府領導或重大客戶要推薦子女入公司，亦要經三名或以上嘅集團副總裁簽字批准，以確認當中唔存在任何嘅利益關係，絕對唔畀裙帶文化入侵聯想。
佢哋仲有一個制度係從來冇變過嘅，公司無論大小會議，任何人遲到都要罰企一分鐘，若會議主持人無嚴格執行，亦會被要求親自到柳傳志面前罰企，實行從最基本嘅層面，體現最嚴格嘅內部管治。