民生銀行（01988）係內地唯一一間由民企出錢成立嘅銀行。既然由民企老闆揸弗，邊個嘅股份多咗啲啲，都可能會影響佢哋嘅話事權。
以前就話民企嘅實力唔強，但依家民企「巨頭」嘅身家都有幾十個億，民行嘅股權分散，但係持股比例又接近到冇邊個股東有絕對掌控力。上個禮拜民行舉行臨時股東會同董事會，班大股東即刻用把口出招。
佢哋見到面實講笑，背後就暗自較勁。巨人集團老闆史玉柱喺呢兩年搏命買民行嘅股份，依家揸住3.02%股權。佢話只係單向買民行，用嚟壓喺櫳底，唔會賣，等第一季業績出爐之後就再增持。
揸住民行2.62%股份、列第八大股東嘅泛海控股集團老闆盧志強，同持3.33%股權嘅東方集團董事長張宏偉，都話考慮緊或者可能增持。只有第二大股東、揸住7.08股權嘅劉永好笑住話史玉柱有錢，「我就冇錢嘞」，史玉柱即刻回應，「呵呵，劉總謙虛嘞」。睇到未？刀光劍影統統就喺言談之間呀。