IQ題：「點解去西藏公幹唔可以打電話畀老婆？」呢條問題其實係西藏5100水資源（01115）嘅財務總監李啟良問絲絲嘅。絲絲最近同佢傾過偈，話說李啟良因為工作嘅關係，單係舊年經已出入西藏42次，係名副其實嘅半個西藏通。話晒西藏都算係「山旮旯」地方，打個電話畀太太報平安都好正常吖。
原來答案係同高海拔有關，李啟良話，因為西藏位處海拔成4,000米咁高，空氣稀薄，我哋呢類生活喺海邊嘅香港人一定好唔慣，傾電話講多兩句好容易「呵……呵……呵……」聲抖大氣，老婆即時誤會啦。哈哈，又好似好有邏輯喎。
不過講番啦，近幾年嘅三月，西藏民間都有示威，都幾亂o架。絲絲就問藏水嘅管理層，社會咁動盪，會唔會影響你哋嘅盈利呢？佢哋話○八年嘅三月確實試過地區政治唔穩定，但近年西藏社會已平穩咗好多。雖然生產線嘅二百幾個員工有九成半都係藏族人，其餘係漢族人，但係管理層話，管理嘅團隊對藏族文化好熟悉同尊重，所以生產線嘅氣氛一向都好和諧。加上佢哋嘅生產地，即係念青唐古拉山嘅水泉，離開首府拉薩有成100公里咁遠，真係人迹罕至，好少受外界影響。
余詩韻