Market Insight：內需股風光不再
內地畀得人民幣波幅擴大，一定係中南海財金專家，相當肯定匯價經過匯改後的三成升值，已達到一個均衡水平，才敢行這一步。第一日試行，人民幣匯價不升反跌收6.3153，反映一年後匯價的不交收合約低見6.3540，意味出口商估計一年後人仔匯價同今日差唔多，三隻航空股全部腳軟，航空股以後要靠自己，條路肯定難行。
無寶不落的高盛，趁市場對人行第二、三季擴大放水規模的樂觀願境，內銀股紛紛死貓彈之際，減持25億美元工商銀行（01398）股份，得到一向對內銀情有獨鍾的淡馬錫垂青，無形中把減持的消息，由負面變番中性，是昨日港股跌幅比預期溫和的主因。不過，歐豬債務問題始終揮之不去，滙控（00005）又跌穿雙頂頸線阻力67.3元，短期走勢似朝着63至64元方向走。
昨日歐洲開市，西班牙五年期違約掉期繼續在500點子的歷史高位樓上，想向IMF救助？IMF高層隨即話要等六月底G20開會，西班牙火燒後欄融資成本日日升，可唔可以等兩個月？無人知，不明朗揸現金向來係芬佬界金科玉律，歐元反應最直接，兌美元跌到1.30邊，隨時穿頭肩頂頸線無眼睇，股市順口溜話sell in May go away，外圍氣氛咁，今年好友似乎已經按捺不住，踏入四月下旬齊齊要錢唔要貨，今浪港股先試二萬點支持機會唔細，想入市不妨畀啲耐性。
鋼鐵行業未見曙光
經濟放緩致供過於求，內地鋼價持續下滑，鐵礦石採購成本調整遠追唔上，鞍鋼股份（00347）發盈警，第一季可能要蝕18.88億元人仔，去年公司蝕21.63億元人仔，一季等於舊年全年損失嘅八成七！鞍鋼一○年賺20.54億元人仔，舊年一鋪蝕凸，唔少賓架都預咗今年上半年唔樂觀，只係估唔到差成咁，昨日鞍鋼股價跌0.15元報5.31元。
睇鞍鋼去年長短債340億元，淨負債對EBITDA，由三年前2.7倍升到7.7倍，早前更改會計準則減低折舊，今年業績紅轉黑仲係無咩希望。一般銀行見到盤數咁樣一定坐立不安。
零售股暫難寄厚望
本地投資者卻深明不要問只要信的投資國企心態，國有銀行長期向國企傾斜，資金無限量支持，鞍鋼去年利息支出19.2億元，相當於5.6厘成本左右，比唔少內地巨型民企至少7至8厘融資成本低一截。毫無疑問，政府唔會畀鋼鐵業巨人倒下，但鋼鐵業黑暗未見盡頭，看來鞍鋼頗有潛力向去年十月低位走近一點。
達芙妮（00210）剛剛公布比同行跑贏一條街的營運數據，首季同店銷售按年增長22%，獲幾間大行出報告唱好，估唔到，管理層立即把握時機出貨，執行董事陳怡勳以每股11元配售3,000萬股，消息令股價昨日插水，開11元後最低見10.66元，收10.88元，接貨者即日帳面又要輸錢。
出口及直接投資放緩，內部消費成為內地經濟支柱的生力軍，可是去年下半年多隻零售業領袖股，同店銷售表現都較預期遜色，管理層對租金及薪酬壓力的展望不表樂觀，高估值馳名的零售板塊，「集體估值萎縮」後顯得反彈乏力，已屬異數的達芙妮管理層都趁高出貨，試問何處是樂土？
盈利步向低增長期
二○○七年百盛集團（03368）市盈率曾高達70倍，隨着盈利增長由當年近47%，回歸到過去三年平均增長10%，市盈率也拉回17.3倍，大行估計今明兩年複合盈利增長回到17至20%，計落PEG尚算在1倍合理範圍，茂業國際（00848）情況也相似，不過較低增長預期下，股價要有大作為唔易。
春天百貨（00331）屬便宜之選，市盈率10.8倍，但增長由過去五年32%至196%，一百八十度到去年倒退近8%，落差之大實在嚇人，咁平通常有佢嘅原因。
至於達芙妮，22間大行17間畀買入評級，頗一面倒，只係平均目標價11.91元，較現價高一蚊左右，古勝覺得唔係佢交唔到數，只係內需股周街跳樓貨，分析員要給高溢價唔易，等批股消化至算。