近排會議多多，要成日四圍飛。祖國仍然繼續高速發展，周圍都係高樓大廈，同時間仲有好多大廈仲起緊。難怪做建材生意嘅中國建材（03323）一一年純利可以升138%至80.15億元人民幣咁勁！
中建材目前受惠幾個因素，首先要講下佢一一年個靚仔業績，超出市場預期5%，咁多中國公司入面嚟講，呢個數字真係出類拔萃！加上水泥價格近期企穩，且有機會上漲，亦會對中建材有利。
集團係中國建材行業裏面嘅大阿哥，主要經營水泥、輕質建材、玻璃纖維同埋玻璃鋼製品，以及工程服務等等。雖然已經過咗幾年，但國家「保增長、調結構、防通脹」等等嘅宏觀經濟政策，以及4萬億元人民幣嘅基建投資額，都令各行各業對水泥需求極盛。此外，中央政府推行節能減排，呢方面會淘汰好多劣質企業，包括產能規模冇效率既企業。呢個情勢，亦有助中建材繼續壯大！
尤其係，中國淘汰落後水泥產能的政策逐步嚴厲，措施非常嚴格，令好多細小同欠缺效率嘅水泥企業都會陸陸續續被淘汰！內地各級政府亦推出一系列措施，令到水泥企業兼併重組速度加快。要喺咁嘅環境下生存，冇番咁上下身形同實力，又點可以行走江湖呢？大家話係咪？中建材往績市盈率不足6倍，息率2.5%。繼續追蹤、出發！
香港大學電子金融服務榮譽助理教授 徐燦傑