絲絲講場：76%人唔知達令搵幾多
絲絲嘅另一半有幾多錢人工？真係考起，原來唔係得絲絲咁信任佢，根據友邦退休金管理及信託最近嘅調查，有76%受訪者唔知道另一半財政狀況。就連佢哋嘅高級副總裁暨執行董事謝佩蘭（Bonnie）都無過問另一半嘅經濟情況。
逾六成人退休唔夠使
香港人以勤力見稱，調查話，83%受訪者表示若果中咗六合彩頭獎，仍會選擇繼續工作，而受訪者心目中退休後，每月生活費嘅中位數大約1.2萬元。之不過，經過獨立精算後，將每位受訪者嘅儲蓄習慣及儲備嘅水平，對比一下佢哋想要退休後每月生活費，超過六成受訪者達唔到其理想退休生活目標。
絲絲認為要實現理想嘅退休生活，須未雨綢繆，先預計下退休後嘅儲備金，否則就會與實際所需有落差。Bonnie建議打工仔應將強積金供款加大，雖然舊年強積金全年錄得8.4%負回報，但今年首兩個月卻錄得8.2%正回報，並寄語僱員要睇長線。
強積金賺唔賺錢，關鍵在於揀咩投資組合，Bonnie透露自己供緊嘅強積金有錢賺，揀咗亞洲股票基金、保證及均衡組合，最重要係佢份強積金風險程度Fit晒自己嘅年紀。