絲絲講場：飛達顏太無假放有老公冧
相信好多打工仔經過四日復活假後都稍有「復活」，不過，一向親力親為嘅飛達帽業（01100）副主席顏寶鈴（顏太）就話畀絲絲聽，佢哋做廠嘅，邊有得放復活節咁開心呀。咁啱嗰幾日仲要係公司嘅訂貨會，顏太當然要親自去杭州「監場」啦，佢又話最開心係訂貨會成績唔錯。雖然冇假放，但顏太嗰幾日都係「冧住」咁忙碌，事關一向廿四孝好老公嘅顏生都有陪老婆去杭州，相信有顏生做伴遊西湖咁浪漫，做嘢幾辛苦都即刻冧番晒喇！
孟加拉開廠唔憂請人
至於早前顏太一直都呻話，內地工人好難請，請咗都好難留，但過咗幾個月後，形勢大不同，皆因佢哋已搵到後盾，唔使再絞盡腦汁去留住啲工人喇。原來飛達喺孟加拉嘅廠房已經正式投產，當地嘅人工低加上勞工供應源源不絕，顏太仲話相信用三十年時間都追唔上依家內地嘅水平，對整體毛利率有正面幫助，佢仲特登調咗管理人員過去添。
孟加拉依家嘅產能規模仲係好細，未來會加大發展。佢仲話，相信業務最困難嘅時間已經過去，未來生意會重上軌道，絲絲都衷心祝福飛達生意愈做愈大。